Ang screen shot ng CCTV footage mula sa Facebook page ng Pinoy TV kung paanong ninakawan ng dalawang babaeng may bitbit na payong ang isang dayuhan sa loob diumano ng CD-R Cybergate Mall sa Cebu.
CEBU – Isang kaawa-awang dayuhan ang nabiktima ng dalawang babaeng magnanakaw sa loob mismo diumano ng CD-R Cybergate Mall dito sa Cebu.
Bagamat nakalusot sa batas ang dalawang babae ay nahuli naman sa surveillance camera ng tindahan ang naturang modus operandi. Sa video clip na naka-post sa Facebook page ng “Pinoy TV today” ay makikita doon kung paanong nilansi ng isang babae ang dayuhan at ng makuha ang wallet sa loob ng bag nito at saka mabilis na lumabas ng tindahan.
“Ingat po tayo sa mga ganitong modus “Payong Gang” lalong-lalo na sa panahon ngayon ng tag-ulan at pwede to mangyari san man tayo magpunta,” babala pa ng Pinoy TV today.
Kaawa-awa naman ang lalaking biktima at nagulat pa ito ng malamang nawala ang wallet sa kanyang shoulder bag at lahat na yata ng bulsa ng pantalon at maging laman ng bag ay inilabas nito sa akalang naroon pa ang wallet.
Naganap umano ang insidente tanghali nitong July 16 lamang. “Please share para lumiit ang mundo ng mga ito at mapanood ng iba…Pinoy TV. Credit (goes) to: Ikwento Mo Kay Delio,” ani pa ng administrator ng Pinoy TV today.
Umani naman ng ibat-ibang reaksyon mula sa mga netizens na nakapanood ng video clip.
“Ang bilis ng kamay. Kung hindi ko pa inulit (and video) hindi ko makikita. Tsk! Grabe ang mga taong iyan. Sigurado ako may mga pamilya din sila, mga anak, at maatim kaya nilang ipakain sa kanilang mga anak ang pagkain na ipinambili ay mula sa nakaw na pera? Sana naman kung may makabasa nito na gumagawa ng ganyang bagay, aba eh panahon na para magbago kayo. Matakot kayo sa batas, sa langit kung hindi man kayo natatakot sa batas dito sa lupa,” ani Khulet Morgan bilang tugon sa napanood.
Sinabi naman ni James Israel Beltran: “Walang silbi yung CCTV? Dapat meron nanunuod dun sa monitor kung saan naka-attach yung CCTV para kung sakali mang may mawalan eh mahuhuli agad kasi meron nagbabantay. Para saan yung CCTV, mag-record lang ng mga kriminal? Walang kuwenta.”
“Kapal ng mukha, yan ang ipamana niya sa anak niyang dalaga. Nakakahiya kayong mga ina,” wika naman ni Hannah Anne Daguipa sa kanyang post.
“Kawawa naman si Kuya. Grabe at kababaeng tao! Tsk,” ayon naman kay Kaye Amante at ito rin ang sinabi ni Ruby Jaboya sa kanyang post sa Pinoy TV today: “Kawawa naman yung foreigner ata yan si Kuya. Grabe mga magnanakaw na yan.”
Ang Cebu ay pangunahing tourist destination sa bansa at tiyak na magiiwan ng masamang ala-ala ang naganap sa dayuhang biktima nitong krimen. (Cebu Examiner)
20