SUKO NA UMANO ang Pangulong Rodrigo Duterte sa kanyang tungkulin bilang pinuno ng bansa at nagsisisi ng malaki sa pagtakbo nito bilang Presidente noong 2016. Ayon kay Duterte, matindi umano ang korapsyon sa pamahalaan at isa ito sa mga dahilan kung bakit wala na itong ganang magpatuloy bilang Pangulo at nais na umanong magpahinga.
“Nawad-an ko og ganang motrabaho. Actually, nagmahay gyud ko. Nagmahay ko nidagan ko og presidente,” ani Duterte. Inihalimbawa pa nito ang umano’y korapsyon sa Nayong Pilipino at sa V. Luna Medical Center ng Armed Forces of the Philippines.
Sinabi ni Duterte na pumasok sa isang lease contract ang Nayong Pilipino Foundation Inc. sa Landing Resorts Philippines Development Corp. na subsidiary ng Hong Kong’s Landing International Development Ltd. upang maitayo ang $1.5-bilyong casino resort sa Entertainment City ng wala umanong public bidding. “They allowed a casino to be erected without a public bidding. Nisurop akong dugo. What’s the essence of a casino inside Nayong Filipino? Nganong ibutang nimo diha? How stupid,” wika pa ni Duterte.
At iginiit rin nito ang umano’y matinding katiwalian sa militar matapos na matuklasan ang P17 milyong “irregular deals” sa V. Luna Medical Center. Tinawag ni Duterte na “systemic” ang korapsyon sa militar. Mariin ang pag-amin ni Duterte na hindi na ito nasisiyahan sa kanyang panunungkulan. “Moingon mo karon nga happy ko, ‘di ko mamakak. Nganong mamakak man ko? I don’t have any obligation to you to tell a lie. I’m sick and tired of the system,” sabi pa nito.
Makailang-ulit na rin na sinabi ni Duterte na ito ay pagod at gustong-gusto ng magpahinga, subali’t hindi naman magawa dahil kung ito ay bababa sa puwesto ay si Bise Presidente Leni Robredo ang siyang papalit sa kanya na wala umanong kakayahang dahil sa pagiging mahina at babae nito.
Sa kabila ng reklamo ni Duterte ay maugong naman ang balita sa ambisyon at plano ng anak nitong si Davao City Mayor Sara Duterte-Carpio na tumakbo bilang Pangulo sa 2022. Ito rin ang dahilan kung bakit binuo ni Sara ang political party na Hugpong ng Pagbabago at nakipag-alyansa sa iba’t-ibang political parties sa buong bansa at naglagay ng sariling senatorial bets at nagwagi sa nakalipas na halalan. (Mindanao Examiner)
Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read And Share Our News: https://www.mindanaoexaminer.com
Mirror Site: https://mindanaoexaminernewspaper.blogspot.com
Digital Archives: https://issuu.com/mindanaoexaminernewspaper
Media Rates: https://mindanaoexaminer.com/ad-rates
20
