KIDAPAWAN City – Hindi na nakapagdiwang pa ng Teacher’s Day ang isang public school teacher matapos na matagpuang patay sa loob ng kanyang silid sa kanilang bahay sa Barangay Buena Vida sa Makilala, North cotabato.
Ayon kay Makilala East District Supervisor Renato Corre, umaga ng Miyerkules ng matagpuan si Abryl Dominado, nasa hustong gulang at residente ng nasabing lugar na wala ng buhay.
Ayon sa mga kamag-anak, posibleng nabangungot umano si Dominado ng hindi na ito makagising upang pumasok sa trabaho.
Nabatid na isang araw bago binawian ng buhay ang guro ay hindi na maganda ang kanyang pakiramdam.
Nakapagpadala pa daw ng text message sa mga kapwa guro si sir Abryl na nagbabati ng maligayang araw ng mga guro, isang gabi bago siya binawian ng buhay.
Sinabi ni Corre na isang malaking kawalan sa sinisilbihan nitong eskwelahan sa Buena Vida Elementary School ang maagang paglisan ni Dominado. Para sa kanyang mga mag-aaral at kasamang guro isang mabait na titser si Sir Abryl.
Bukod sa pagiging guro ay isa ring Pastor si Dominado sa sinisilbihang simbahan. Itinuturing din siyang ‘bread winner’ sa kanilang pamilya.
Nagpaabot naman ng pakikiramay ang mga school heads, maging ang mga kasamang guro at mag-aaral sa naulilang pamilya ni sir Abryl. (Rhoderick Beñez)
