ZAMBOANGA CITY (Mindanao Examiner / July 27, 2014) – Nasa kritikal na kondisyon ang dalawang magkaibigan matapos silang barilin at tagain ng itak ng isang grupo ng mga kalalakihan habang nasa inuman sa Zamboanga City.
Ayon sa pulisya, naganap ang atake dakong alas 8.30 ng gabi nitong Sabado sa Wing Go Subdivision sa Barangay San Roque. Nasa kasarapan ng inuman sina Marvin Alvarez, 27, at Kenny Advincula, 25, kasama ang tatlo pang iba ng biglang dumating ang grupo ng mga lalaki na armado ng itak at baril at bigla na lamang silang tinira.
Sa ulat ng pulisya ay tinaga sa leeg at mukha si Marvin, samantalang may tama naman ng bala si Kenny sa kanyang katawan. Matapos umanong atakihin ang dalawa ay mabilis na nagpulasan ang mga kalalakihan at iniwan ang mga duguan biktima. Masuwerte naman nakaligtas ang tatlong kasamahan nina Marvin at Kenny sa atake.
Naisugod sa hiwalay na pagamutan ang dalawang biktima at ngayon ay nasa kritikal na kalagayan pa rin.
Sinabi naman ni Insp. Dahlan Samuddin, ang regional police spokesman, na maaring may matagal ng alitan ang dalawang grupo. Nakilala na umano ang nasa likod ng krimen at ngayon ay pinaghahanap na ng pulisya. (Mindanao Examiner)
20