PAGADIAN CITY – Dahil lamang sa isang alagang baboy, binoga ng isang lalaki ang live-in partner na ngayon ay nasa pagamutan pa rin sa Zamboanga del Sur province.
Sinabi ng pulisya na patuloy ang paghahanap sa magsasakang si Junrel Ganub, 28, matapos nitong barilin ng shot gun ang partner na si Mary Joy Portallo, 21, habang nasa kainitan ng pagtatalo sa kanilang bahay sa Barangay Tiguian sa bayan ng Margosatubig.
Nag-ugat ang pagtatalo sa baboy na nais umanong ibenta ni Mary upang may magamit na salapi sa kanilang gastusin, ngunit pinalagan naman ito ni Junrel hanggang sa umabot sa pagtatalo ang usapin.
Dito na umano kumuha ng homemade shot gun si Junrel at saka binanatan sa dibdib ang babae. Agad itong tumakas matapos ng pamamaril. Naisugod naman sa pagamutan ang biktima matapos na humingi ng saklolo sa mga opisyal ng barangay. May tama sa kanyang kanang dibdib ang babae, ngunit hindi pa mabatid ang kalagayan nito.
Nabawi ng mga parak ang 12-gauge shot gun ni Junrel na kargado pa ng mga bala sa talahiban sa likod ng kanilang bahay. Nahaharap sa kasong frustrated homicide si Junrel, ayon sa pulisya. (Mindanao Examiner)
20