DI NAKO masabtan ngano nga si Jose Ma. Sison ma-headline pa gihapon bisan og ang iyang mga pamahayag bunga lamang sa iyang imahinasyon. Iyang gipahayag sa pinakaulahi niyang deklarasyon nga sa tuig 2019 ang prinsipal nga agenda sa CPP/NPA mao ang pagpalagpot kang Pres. Rodrigo Duterte. Kataw-anan ug makalolooy tungod kay sukad sa unang adlaw nga ningbiyahe siya padulong sa yuta sa pantasya kun asa gusto niya nga ipundar ang iyang maka-komunista ug kontrolado nga gobyerno, kanunay na siyang nakigkomplot sa mga disipulo sa mga romantiko sa politika ug nagpahimulos sa uban nga di modawat sa gipili sa mayoriya ug nakigkunsabo sa mga tawo nga pareha ni Joma nga hilig manglaktud sa tamang proseso.
Dili na konektado si Joma sa realidad ug wa makatabang nga tua siya nagpuyo sa laing nasud ug wala sa Pilipinas nga giinsister niya nga maoy tumong sa iyang pakigbisog apan ningbahag ang ikog ug wa mobalik aron pangunahan ang gikapoy na nga panon sa armado nga nagtuo pa gihapon sa iyang damgo sa utopia. Di sab siya kabiya sa maanindot nga kinabuhi sa Netherlands.
Gibasol ni Joma ang gobyernong Duterte sa pagtalikod sa peace talk. Apan sulod sa hapit singkwenta anyos ang mga nangaging administrasyon apil na sa iyang patron nga si Cory Aquino nga naghatag kaniya og kagawasan nagsige og pangulitawo kaniya aron mobalik ug mopartisipar sa gawasnong proseso sa politika. Ning-adjust pa gani ang gobyerno pinaagi sa paghimo og balaod nga naghatag og legalidad sa komunismo ug naghatag og kahigayonan sa maka-kaliwa nga mga politiko nga molansar kadaghanan ilawom sa sistemang Party-list. Pipila sa ilang mga deputado nasakpan sa akto nga nagtudlo sa dali rang ilaron nga kabatan-onang lumad og unsaon paggamit og pusil batok sa pwersa sa gobyerno.
Wa nay laing mas pabor pa nga oportunidad para kang Joma sa pagpakigsabot sa kalinaw ug kahusay kay sa gobyernong Duterte. Hinumdomi nga sa pinakainit nga bahin sa kampanya para sa pagka Presidente, ang Mayor sa Syudad sa Davao giakusar sa iyang mga pinakapanatiko nga kalaban sa politika nga kuno tigpanalipod siya sa mga komunista. Dayag man kaayo sa katawhang Pilipino nga si Mayor nagsulod-gawas sa mga luklukanan sa NPA aron pagsalbar sa mga priso sa gyera ug usahay modala siya og makaon para sa mga gerilya sa NPA. Kun naa may lider sa politika nga maayo og katuyoan ug sinsero kaayo sa iyang tinguha para sa normal nga kinabuhi sa mga rebelde, kining tawhana mao si Duterte.
Apan ang ideya para sa kalinaw ug normal nga kinabuhi wala makaangkla sa walay pulos nga hunahuna ni Jose Ma. Sison. Anaay panultihon sa yanong pakighinabi nga haum kaayo niining maong situwasyon: “Kung ayaw mo, huwag mo”. (If you don’t want it so be it.) Ug tungod niini, ang tawo nga gustong palagputon ni Sison sa Malacanang ning-abli og bag-ong inisyatiba – peace talk sa lokal. Bag-o pa lang gani nga gisugdan, ang maong lakang ning-ani na og kalampusan tungod kay gatusan na sa mga NPA ang ningbalik sa payong sa balaod, gitagaan og kapuy-an ug yuta nga kultibaron apil na ang dakong kantidad sa salapi baylo sa ilang pusil aron sila makasugod og bag-ong kinabuhi.
Gusto ni Joma nga palagputon si Duterte, pipila ka obispong Katoliko nag-ampo nga magsakit si Duterte ug mamatay samtang si Loida Lewis wa pa mobiya sa iyang paglaom nga si Duterte mo-resign o mapalagpot aron mopuli si Leni Robredo. Apan unsaon pagtuman ning damgo sa nagbuka ang mata kun ang pinakabagang duot sa katawhang Pilipino naghatag niya og grado nga “very good” o “ekselente” samtang gatusan ka mga rebelde nanlugsong gikan sa kalasangan aron makig-uban na sa ilang mga pamilya ug modawat sa mga oportunidad nga naghulat kanila? (Jun Ledesma)
10,960 total views, 1 views today
