BIGtheme.net http://bigtheme.net/ecommerce/opencart OpenCart Templates
EXCLUSIVE: Sultan of Sulu, North Borneo rejects BOL, asks Duterte to establish Federal government
November 8, 2018
Multiple people injured in California bar shooting: US official – Al Jazeera
November 8, 2018
Show all

OPINYON: Way kukaluoy nga pagkombati sa kurapsyon Ni Jun Ledesma

KUN KINSA TONG nagsulti nga ang kurapsyon sa sulod sa gobyerno mawagtang sa sulod sa duha o tulo ka tuig nagadamgo lamang. Bisan pa og mogamit si Pres. Rodrigo Duterte og baston sa magic, di niya ni makaya. Ang kurapsyon sa gobyerno giplastar ug gipadulot og maayo sa administrasyong BSAIII. Bisan si Hercules di makakaya nga modismantle niini, si Duterte pa kaha nga tawo lamang? Apan kitang tanan nangandoy niini.

Karong semanaha nadugangan ang akong nahibaw-an. Anaa diay sobra usa ka dosena nga mga coalition against corruption. Usa niini nasilo sa ako tungod sa akong pagmantala sa hangyo sa Makati Business Club nga ipalanog sa publiko nga ang ilang CAC wala magpaluyo sa panawagan nga paluwaton si DOF Sec. Sonny Dominguez sa iyang katungdanan.

Ang editorial desk sa Philippine News Agency nagpadala sa ako og kopya sa pamahayag sa Coalition Against Corruption. Usa sa ilang gideklarar mao ang impormasyon nga rehistrado sila sa SEC ug tungod niini di sila peke nga organisasyon. Ila sab nga giinsister nga wa sila mag-claim nga sakop ug wa sila mangandoy nga magpasakop sa MBC nga duna nay kaugalingon nga CAC.

Kini nga CAC hugot nga ning-insister nga gawas nga di sila peke nga CAC, ang ilang mga ginsakupan mga personahe nga way hunong sa pagsuporta sa maayong pangagamhanan ug sa kombati sa Presidente batok sa kurapsyon. Sa lista nga akong nadawat, CAC Chairman si Manuel Obedoza nga Chairman sab sa VACC; Vice Chair si Alicia Risos-Vidal, National president sa Womens Lawyers Association of the Philippines; CAC President si Lovensky Fernandez, President sa Kilusang Pagbabago National Movement for Change; Enunina Mangio, VP for External Affairs ug Treasurer; Nicon Famerong, VP for Internal Affairs; Monalie Dizon, Secretary; ug John Rana, Public Relations Officer. Ang mga sakop sa Board mao sila si Rosalina Bistoyong, Gonzalo Catan, Eddie Choa ug Ma. Teresa Moncupa.

Kini nga rehistrado nga CAC nag-insister nga sila nag-organisa aron pagtubag sa panawagan ni Presidente Duterte og suporta gikan sa pribadong sektor sa Giyera Batok sa Kurapsyon.

Karon nga nagkailaila na ta ug human maklaro nga kini nga CAC dili peke, akong pangayoon ang inyong pasaylo tungod sa akong pagduda kun kinsa gyud mo. Di lisud ni nga himoon tungod kay dugay na kong nagakrusada batok sa krimen ug kurapsyon ug isip usa ka magsusulat nga nagpuyo sa Davao nakadawat ko og mga pagdasig gikan kang Mayor Duterte mismo, nga karon Presidente na, sa pagpursige sa maong krusada. Karon, human nakog korek sa mali nga impormasyon, hangyoon nako mo nga sa sunod nga mga pamahayag sa publiko o sa prensa, ilakip gyud ninyo og seguro ang kinutlo nga pamahayag sa inyong Chairman o Presidente aron mahibaw-an kun asa gikan.

Tugoti ko karon nga mopadayon og hisgot sa ikaduhang tema niining akong sulat. Duha sa pinakakurap nga ahensya sa gobyerno mao ang Bureau of Internal Revenue ug Bureau of Customs. Ang ikatulo mao ang Department of Public Works and Highways. Nahimong pokus karong bag-o ang BOC sa mga magbalantay sa mga kahiwian sa gobyerno dili tungod kay wa niya makab-ot ang target niya sa pagpangolekta og pondo para sa panudlanan sa gobyerno kundili tungod sa kargamento sa illegal nga droga nga gipayuhot pinaagi sa Customs. Ang mga sindikato sa krimen wa pa mahutdi og mga pamaagi sa pagpayuhot dugang sa arte sa pagpadanglog pinaagi sa saburno ug panghulga. Kun sumadahon, tama si Presidente Duterte sa pagbutang sa BOC ilawom sa supervision sa military, apan di sab ni angay nga ipermanente.

Napahiluna na ang mga reporma sa Bureau of Internal Revenue. Pipila ka bulohatong administratibo gipasa na sa rehiyon aron mas sayon sa mga taxpayers ang pagpatigayon sa ilang mga bayronon sa buhis nga minos ang kontak nga personal. Angay unta sab ni nga giplastar dayon sa BOC. Ang mga transaksyon nga way papeles minos og kontak nga personal ug tungod niini, makunhoran sab ang posibilidad sa mga negosasyon nga “under-the-table”.

Sa tinud-anay lang, ang pinakamaayong sukdanan kun nasumpo ba o wala ang kurapsyon sa BOC ug BIR pananglitan mao ang ilang agi sa pagpangolekta og pondo para sa panudlanan sa gobyerno. Sa pagkakaron, pwede natong tagaan og grado nga “A” kining maong mga ahensya tungod kay ilang gideliver ang output nga mao gyuy kinauyokan sa ilang trabaho. Sa DPWH, ang atong timbangan mao ang kalidad sa trabaho ug kapaspas. Di na ko maglipudlipod. Ningtak-op ang administrasyong Aquino nga daghan og gibiyaan nga mga proyekto nga wa humana. Ang mga skyway padulong sa NAIA sa tinuod mga tinapok lamang nga mga slab nga semento, nagaistambay nga mga makinarya, ug maihap sa tudlo nga mga trabhanteng nag-istambay. Apan sa paglingkod pa lang gyud sa gobyernong Duterte, ning-andar dayon ang mga makinarya ug naporma dayon ang mga proyekto.

Seryoso nga ginapursige ang kombati sa kurapsyon ug ang unang nangaigo mao ang mga tawong kaniadto mga kauban ni Duterte. Ang problema kay naa pay mga manunubad nga nagalibotlibot aron tay-ogon ang pundasyon sa gobyernong Duterte. Ang Presidente mismo ang pinakaprinsipal nga target sa way hunong nga pag-ataki gikan sa han-ay sa mga nagasul-ob og abito sa relihiyon, sa Commission on Human Rights nga nagpadayon og sabwag sa kataw-anan ug way basihan nga istorya sa Davao Death Squad ug sa gipaburot nga numero sa mga biktima kuno sa extra-judicial killings, ug sa dakong coalition sa oposisyong political ug CPP/NPA/NDF nga ang tuyo ug tinguha mao ang pagpalagpot kang Duterte.

Nabuang na ba gyud diay ang atong politika, resulta nga ang usa ka impromtu nga sulti sa actor nga si Aga Muhlach (nga nagsugyot nga ang oposisyon sama kang Antonio Trillanes mosuporta na lang unta sa administrasyon) gitanggal gikan sa usa ka yugto sa Magandang Gabi Vice. Mora na hinoon kini og mas law-ay pa sa grabe ka dugoon nga pinatyanay sa way hunong nga mga episode sa ‘Probinsyano’ sa prime time. Haay na lang. (Jun Ledesma)

 

Read And Share Our News: https://www.mindanaoexaminer.com

5,766 total views, 1 views today