CEBU – Giseguro sa Department of Health nga nagpabiling luwas batok sa ebola virus ang Pilipinas. Matud pa sa tigpamaba sa DOH nga si Dr. Lyndon Suy, naka-alerto ang gobyerno sa mga tugpahanan ug pantalan aron ma-monitor ang lihok sa mga pasahero pasulod sa nasud.
Base sa labing ulahing taho, tulo ka nasud sa West Africa ang nagdeklara og ebola outbreak. Sa pagkakaron, wala pa hinuoy indibidwal nga natalang natakdan dinhi sa Asya.
Bisan pa niini, mas gihingosgan pa sa hiniusang pwersa sa DOH ug Bureau of Quarantine ang pag-monitor niini sa mga tugpahanan ug pantalan. Matud pa nga mas maayong masumpo kini sa dili pa makasulod sa nasud.
Gipahibalo usab sa DOH nga nag-negatibo na sa ebola virus ang 5 sa 15 nga gi-monitor sa ahensya human kini nibalik sa nasud gikan sa Sierra Leone diin sila nagtrabaho.
Gipasalamatan usab sa DOH ang 15 ka mga trabahante sa padayong pakig-alayon niini sa ahensiya alang sa ilang kahimtang sa panglawas.
Sa pagkakaron, hapsay nga makasulod ang mga turista sa mga tugpahanan apan gitumbok sa DOH nga ang mga turista ug mga balikbayan gikan sa mga nasud nga sama sa Liberia, Guinea ug Sierra Leone moduso sa ilang lokal medical clearance gikan sa mga nahisgotang nasud.
Dungan niini, tugotan ang DOH nga i-monitor sila sulod sa usa ka buwan kun naa na sa nasud ug mo-report dayon sa mga regional office nga ahensya kun makasinati kini og bisan unsang sakit.
20