DIPOLOG CITY (Mindanao Examiner / Apr. 19, 2013) – Mikabat na sa 57 ka mga edaran o senior citizens ang malamposong nabakunahan sa Pneumonia Vaccine didto sa Barangay Santa Filomena ning dakbayan sa Dipolog nga gisugdan gikan sa Pebrero 28, diin kini ang magapadayon taman nga mahurot ang maong tambal nga gituyo ug andam alang kanila.
Nasayran ning buhatan sa impormasyon gikan sa CSWDO pinaagi sa OSCA nga usa kini sa mga programa karong tuiga alang sa mga edaran nga libreng ihatag nga gisugdan sa milabayng Oktubre 2012.
Nasayran usab nga lifetime na ang gihatag nga pneumonia vaccines alang niadtong nagpangidaron nga 60 pataas. Busa kalabot niini, padayon karong naga-awhag ang buhatan sa OSCA ngadto sa tanang mga edaran nga modangop ngadto sa matag Barangay Health Centers nila aron mabakunahan sa naasoyng vaccine isip pagsanong ngadto sa Akta Republika 9994 nga giilang “An Act Granting Additional Benefits and Privileges to Senior Citizens”.
Subay sa nasangpit nga kalamboan, malipayong naga-awhag ang inahan ning dakbayan Mayor Evelyn T. Uy ngadto sa tanang mga edaran nga kanunay magsanong sa kalagdaan alang sa pagmintinar sa ilang maayong panglawas aron maka-angkon pa sila ug lugway sa ilang kinabuhi sanglit nga sila ang nagbaton na sa taas nga pangidaron.
20