CEBU – Nimugna si Presidente Benigno Aquino og usa ka inter-agency task force nga motabang sa gobyerno aron epektibo ug hapsay nga masulbad ang mga nanggawas karon nga makatakod nga mga sakit sa nasud aron maatiman ang kahimsog sa katawhan.
Gilagdaan sa Presidente ang Executive Order No. 168 nga nagmugna sa Task Force on Emerging Infectious Diseases (EID) batok sa mga nanggawas nga makatakod nga mga sakit diin ang manguna niini ang Department of Health (DoH) aron masiguro nga daling masumpo ug malikayan ang posibleng pagkatap niini sa Pilipinas.
Matud pa ni Executive Secretary Paquito Ochoa ang maong task force ang mo-assess, magbantay ug mohimo og mga lakang aron dili mokatap ang mga nagkalain-laing sakit sa nasud, apil na usab sa mga Pilipino nga nagtrabaho sa ubang mga nasud.
Ang Severe Acute Respiratory Syndrome ug ang Middle East Respiratory Synndrome Cirronavirus, apil na usab ang nagbalik-balik nga hulga sa meningococcemia, leptospirosis, antimicrobial resistant tuberculosis ug uban pa ang hinungdan mao nga gimugna kining maong task force nga katambayayong ang Department of Foreign Affairs, Department of Interior and Local Government, Department of Justice, Department of Labor and Employment, Department of Tourism ug Department of Transportation and Communications.
Pangunahan sa maong task force ang pagtumbok, pagsusi ug pagtabang sa mga Pilipino nga gidudahang gitaptan sa mga nahisgotang matang sa sakit, apil na usab ang pagpaningkamot nga malikayang mokatap ang maong mga sakit sa nasud ug unsaon kini pagsumpo dayon.
Gihatagan usab og gahum sa Executive Order No. 168 ang pagtabang sa Armed Forces of the Philippines, Philippine National Police ug ubang tigpatuman sa balaod nga magpatuman og mga kamanduan alang sa dali nga paghatud sa mga adunay sakit.
Ang DOH-Task Force Control usab ang mag-andam sa EID Preparedness Manual diin ibutang ang mga lakang ug pamaagi aron masumpo ug malikayan ang pagkatap sa mga nahisgotang sakit. (MBCN, ECB)
20