CAGAYAN (Mindanao Examiner / Dec. 13, 2012) – Sinunog ng isang magsasaka ang sariling bahay sa bayan ng Abulug sa Cagayan province matapos na tumanggi ang asawa nitong umuwi dahil sa kanilang alitan.
Nabatid sa pulisya na nilayasan ng kanyang asawa si Federico Baro, Sr. matapos ng mainitang pagtatalo. Umuwi umano ang babae sa bahay ng mga magulang upang doon magpalipas ng sama ng loob.
Pinilit pa umanong suyuin ni Federico ang asawa at nakipag-inuman pa sa kanyang biyenang lalaki sa pag-asang makakatulong ito upang muling hikayatin ang babae na sumama sa kanya sa pag uwi.
Ngunit matigas ang naging desisyon ng babae at dito na nagbanta si Federico na kung hindi sasama ang asawa ay susunugin nito ang kanilang bahay. Sa pagaakalang pananakot lamang ito ay binalewala ng babae ang banta at hinayaan ang asawang umuwing mag-isa.
Nagulat na lamang ang babae ng malaman sa pulisya at mga kapit-bahay na sinunog nga ng kanyang asawa ang kanilang tahanan. Agad rin dinakip ng mga awtoridad si Federico subalit hindi pa mabatid kung magsasampa ng kasong arson ang asawa nito. (Francis Soriano)
20