BIGtheme.net http://bigtheme.net/ecommerce/opencart OpenCart Templates
Radyo Mindanao April 16, 2018
April 16, 2018
Troops capture wounded NPA amazon in Bukidnon province
April 16, 2018
Show all

‘Siguro naman may nahimong kaayohan si Duterte’ Ni Jun Ledesma

Mga Sulat gikan sa Davao: ‘Siguro naman may nahimong kaayohan si Duterte’ Ni Jun Ledesma

AMBOT OG UNSAON sa mga balasubas nga tigguba sa dungog ni Duterte kining mga lab-as pa kaayong mga katikaran. Ang Social Weather Station ningmantala sa survey nga gisakop ang tulo ka bulan ug nagpakita kini nga nasustinir ni Pres. Rodrigo R. Duterte ang iyang grado nga “very good” o maayo kaayo ang katagbawan sa katawhan sa iyang pangagamhanan bisan og ningkibra kini og dos porsyento. Presko pa ni nga resulta human sa biyahe sa Presidente ngadto sa Boao, Hainan, China kun diin nahimo niya ang usa ka espesyal nga pakig-atubang ug pakigsabotsabot sa bag-ong napili nga Presidente sa China nga si Pres. Xi Jinping.

Sa maong panagtagbo gianunsyo ni President Xi ang P3.8 Bilyon nga ayuda sa ekonomiya sa Pilipinas. Ting-init karong panahona alang sa mga desperado ug morag mga irong buang nga mga kalaban ug kritiko ni Presidente Duterte sa politika. Bisa’g unsaon, bisa’g balibalihon pa og tan-aw. Ang ilang batabata nga si VP Leni Robredo ning-adto sa Europa aron sa pagdeliber og usa ka diskurso ngadto sa mga nag-eskwela sa London School of Economics and Politics. Ang iyang tema mao ang pag-alibyo sa kawad-on ug ang papel sa mga politico sa ekonomikanhon nga kalamboan. Nasubo ko alang sa maong institusyon.

Kun kinsa man ang nagkumbinsi nila nga eksperto si Robredo niining maong tema mas buang pa sa lubing way unod. Wa ko makaminos sa Bise Presidente apan angay unta niyang gibalibaran sa matinahuron nga pamaagi ang imbitasyon tungod kay wa gyuy usa ka tema didto nga maingon nato nga aduna siya’y kahanas. Sa laing bahin, ninglampos hinoon siya sa pagpa kodak kodak ug ning-uli nga nagdala og orig nga bag nga gikan jud sa nagdesinyo, sumala pa sa usa ka komentarista sa Facebook.

Kun atong itandi, duol ra ang giadto ni Duterte sa China, aron sa pagdeliber og pinakamubo gyud nga diskurso (walo ka minutos) basi sa iyang naandan ug ningsungkit kini og P3.8 Bilyon nga tabang pinansyal, lahi nga package o tinibo nga mga puhunan nga tumong ang pagpausbaw sa kapasidad sa TV ug radio broadcasting network, ug mga panaad sa mga mamumuhunan nga mobun-ag og di mominos $9 Bilyones dolyares nga puhunan.

Bisa’g unsaon og tan-aw kining maong mga katikaran, mosangko gihapon sa konklusyon nga anaay kauswagon, himsog nga political ug ekonomikanhon nga relasyon tali sa Pilipinas ug China. Ang mga kalangas, kasamok ug kuskos balungos nga gimugna sa ning-aging administrasyon bahin sa isyu sa kasadpan nga kadagatan sa Pilipinas ang ehemplo kun unsaon ang pabilo sa panagbingkil pwedeng maresolba ug mausab padulong sa panagkumboya ug paghimo og mga linangkob nga mga proyekto ug programa nga mohatag og benepisyo sa duha ka nasud. Angay nga mohatag ni kang Robredo og pagtulun-an bahin sa papel sa politiko sa ekonomiya.

Apan ang dako gyud nga pampahupay sa kasingkasing ni Presidente Duterte mao ang mahinungdanon ug makahuluganon nga resulta sa SWS survey. Ang nag-unang tulo ka hut-ong (ABC) sa ekonomiya ug katilingban ninghatag kaniya og “very good” nga grado samtang ang nahatungang hut-ong o middle class ug apil na ang masa nagpabilin nga lig-on ug hugot nga nagasuporta sa iyaha nga sa akong tan-aw mao ang pinaka importanteng datos sa maong survey.

Ang mga hut-ong nga nahimutang sa ubos nga ang-ang sa ekonomiya ug katilingban ninghatag kaniya og gradong 35% sa Septyembre, ningbali ug ninghatag kaniya og makabungog nga gradong 65% sa Disyembre. Ningkibra hinoon ni sa bulan sa Marso ngadto sa 48% na lang apan kini nga grado “good” o maayo gihapon. Mas madasigon pa gyud ang hut-ong sa mga estudyanteng mogradwar ug gibaliwala nila ang grupo sa mga estudyante nga nagpahimulos sa scholarship sa Philippine University Campus. Kun makamao ning mga bataa sa ilang statistics, 48 sa Septyembre, 69 sa Disyembre ug 48 sa Marso, makapamalandong kini sila bahin sa ilang pagpakig-alyansa sa mga makakaliwa ug sa oposisyon sa politika. Ang Mindanao ninghatag kang Duterte og ekselente nga grado. Wala ko kahibalo og asa iplastar ang kritisismo sa oposisyon ug kritiko nga ang Mindanao kuno usa ka lugar nga ang pagpamugos ug pagpanumpo nagadominar tungod kuno sa pagdeklarar sa Martial Law sa Mindanao.

Kun unsa may balor niini, tungod kay ang Pilipinas ning-atras na man sa iyang pagkamiyembro sa International Criminal Court, kining dili kaduhaduhaan nga datos ang angay nga motubag sa pagpakilantugi sa nagabuwang baba sa oposisyong sa politika ug sa kataw-anan nga alyansa sa sektor sa mga relihiyoso ug sa CPP/NPA nga ilang gimontar kontra kang Presidente Duterte. Pwede silang magyagaw apan klaro kaayo nga way maminaw kanila, gawas sa ila ra sab nga han-ay.

Paminaw na lang mo sa awit nga Iningles nga nag-ingon nga: “(Duterte) must have done something good”. Sa laktod nga pagkasulti, siguro naman may nahimong kaayohan si Duterte. (Jun Ledesma)

 

Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read Our News on: http://www.mindanaoexaminer.com/
http://mindanaoexaminernewspaper.blogspot.com/
Share Our News
Digital Archives: http://issuu.com/mindanaoexaminernewspaper

14,971 total views, 0 views today