BIGtheme.net http://bigtheme.net/ecommerce/opencart OpenCart Templates

‘Ayaw tinontohi si Duterte’ ni Jun Ledesma

BSP expects inflation to hover around
February 10, 2018
HOT OFF THE PRESS: The Mindanao Examiner Regional Newspaper Feb. 12-18, 2018
February 11, 2018
Show all

‘Ayaw tinontohi si Duterte’ ni Jun Ledesma

Mga Sulat Gikan sa Davao City: 

NING-ULBO ANG kaspa ni Pangulong Rodrigo Duterte sa miting sa Gabinete niadtong Lunes human siya gipahibalo ni DICT Secretary Eliseo Rio nga pipila sa mga kompaniya sa telecom nga nagtinguha nga mahimong ikatulong magdudula sa telecom ninghangyo nga ang dedlayn sa pagsumite og kompletong mga papeles ibalhin gikan sa Marso 15 ngadto sa bulan sa Mayo. Ang maong mga kompaniya kinahanglan nga magsumite og mga papeles ug mga kredensyal nga nagpakita nga kaya nila ang pakipagkompetensya sa PLDT/Smart ug Globe nga mao ang higanteng duopolyo nga nagkontrola sa telecom sa nasud ug nagpugong sa paglambo sa serbisyo.

Mahinumdoman nato nga sa nahaunang katikaran sa industriya sa telecom, napikal kaayo si Duterte sa dihang ningsulay og pasakalye ug diskarte si Manny Pangilinann sa PLDT ngadto kaniya aron taplan sa gobyerno ang kuno P3-billion nga kuno gigastos nila gamit ang Connectivity Unlimited Resource Enterprises (CURE) frequency.

Wa motuo si Duterte sa sugilanon ni Pangilinan. Ang iyang gihimo, sayo pa sa iyang paglingkod sa pagka Pangulo sa nasud, iya na nga gigastoan og taas nga panahon ug gitukawan sa gabii ang pagtuon sa teknolohiya sa impormasyon ug komunikasyon ug ang kuni-kuneksyon niini human sa padungog-dungog ug pasimple lang nga sulti ni MVP nga pasagdahan lang ug itugyan lang sa kamot sa duopolyo ang industriya sa telecom tungod lagi kuno kay walay usa sa Gabinete sa bata pang administrasyon ni Duterte mga makasabot sa kakuti sa ICT.

Nah, giminosan sila sa tawo kay si Duterte mahilig man moistorya nga ang iyang grado sa eskuylahan igo-igo ra gyud nga makagunit og dunggan ug magbitay-bitay lamang sa 75% ngadto 79%. Hangtud karon ubay-ubay pa gihapon ang masulod sa lit-ag sa pagkakomedyante sa Pangulo nga mahilig mosagol og mga lamas sa iyang mga pakigpulong aron paminawon ang ubang parte sa iyang mensahe. Makit-an man na nato nga si Duterte dili pareha og kalibre sa nanag-unang Pangulo isip mamumulong, apan siya ang ginapaminaw og maayo. Laina ang tahop ug bugas ug makita nimo nga ang iyang mga diskurso puno og kaalam sa politika ug mga proyektong mahimo.

Pamalandongan ni nato. Unsa may komplikado bahin sa CURE nga usa ka kompaniya nga dunay prangkisa nga kontrolado ni Roberto Ongpin ug usa sa upat nga gihatagan og frequency band og two x 10 MHz sa usa ka “beauty contest” nga gipasundayag sa NTC aron sa pagguyod sa 3G mobile network dinhi sa nasud kay ang mga 2G network sa pagkakaron dili makahatag og mas taas nga serbisyo? Para sa usa ka nakapasar og bar exams sama ni Duterte nga nakahibalo sa Konstitusyon ug hanoy nga makasaysay niini, kini  nga isyu sayon ra kaayong sabton.

Aron di siya mainsulto nga ang iyang kahibalo bahin sa teknolohiya ug industriya sa telecom zero, nagkugi siya og panukiduki og iyang nadiskubrihan nga ang tulo ka awardee mao ang Smart, Globe ug Digitel. Dili ni lisud sabton.

Gikan dinhi iyang nahibaw-an nga gawas sa regular nga pagbayad sa spectrum user’s fee o SUF, ang gobyerno wala moimposar og bayad sa paghatag og freaquency sa naginahanglang kompanya sa telekomunikasyon. Mas hayag pa ni sa silaw sa adlaw ug karon ato na nga masabtan og asa nanukad si Duterte dihang ang PLDT/Smart ningbungat og P3-billion nga bayad sa frequency nga gihatag sa gobyerno og libre!

Mao na ang rason ngano nga ang Pangulo taas og kompiyansa ug walay pagduhaduha nga mosulti nga ang Frequency Spectrum usa ka nasudnong bahandi ug kabilin ug dili angay nga ipailawom sa kang bisan kinsa ug bisan unsa nga transaksyon sa negosyo. Kahibalo siya nga ang gobyerno ninggahin niini nga frequency bands ilawom sa kasabutan nga ang mga awardee moggama og mga imprastruktura nga modalit og mga serbisyo nga gikinahanglan sa publiko. Wala ni himoa sa CURE ug gipahimudsan na hinuon ni Ongpin ang iyang prangkisa pinaagi sa pagbaligya sa CURE ug sa iyang bililhong 3G frequency ngadto sa Smart/PLDT sa gwapong presyo. Walay pagsupak niadtong panahona ang National Telecommunications Commission sa maong transaksyon.  Ang Pangulong Duterte  nahibalo na niini sa iyang pagpangdukiduki.

Pipila lang ka pangutana ang gihimo ni Duterte aron makuha niya ang mga tubag kabahin sa gibungat sa PLDT nga P3-billion nga itapal sa gobyerno sa ilang gasto kuno. Batakan ug mahinungdanon kaayo ang nakuha niyang mga tubag, ug solido ang iyang gibarugan, mao nga iyang gitubag sa demand sa P3-billion simple ra: “Akong ipahiling ang inyong mga libro sa BIR”.

Lagmit nagpahiyom nga sagol yam-id ang reaksyon ni Duterte pagkahibalo niya gikan kang Secretary Rio nga isurender sa PLDT ang frequency sa CURE nga way bayad bisag usa ka sentimo. Mora man sab hinoon og madunggan nako ang yagubyob niya mga nagkanayon, “Ayaw gyud ko ninyo og testingi. Ayaw mog tinonto sa akong administrasyon. Wa koy utang ninyo.”

Naghimo ko og kinaugalingon nga pagpanukiduki kun giunsa paggahin ang mga frequencies ug nganong ningtugpa ang tanan sa kamot sa duopolyo. Kini ang laktod nga istorya:  Gawas sa CURE gipalit sa PLDT ang Digitel uban sa iyang Mobile network nga dunay frequency nga 900 MHz para sa 2G, 1100 MHz para sa 3G, ug 2300 MHz ug 2500 MHz para sa Broadband Wireless Access (BWA).

Ang akong mga gi-interbyo sa industriya nagsulti nga ang NTC ning-aprub sa pagbaligya sa Digitel ngadto sa PLDT sa kondisyon nga isurender sa PLDT o ibalik ngadto sa Commission ang frequency band nga gigahin sa CURE tungod kay ang PLDT/Smart automatic man nga ninghupot sa tanan nga mga frequency nga gigahin sa Digitel: 900 , 1100 , 2300  and 2500 MHz bands . Supak ang Globe sa automatic nga pagbalhin sa mga frequency ngadto sa PLDT/Smart apan gi-overule siya sa NTC niadtong panahuna.

Balik ta sa kasamtangan. Sa akto sa pag-uli sa PLDT sa gigahin nga frequency sa CURE balik sa NTC, ninglabay sab siya og bola nga liyog ang lupad pinaagi sa pag-insister nga taplan sa gobyerno ang P3-billion kuno nga gasto-puhunan sa CURE frequency. Tinonto. Sa sinultihan pa ni Duterte – bullshit.

Sa akong panaghap may mga kaantigo nga mga magtatambag bahin sa telecom ang Pangulo nga ninghagawhaw sa iya nga ang mga kahimanan sa radio nga gigamit sa 3G mga software-driven radio (SDR) ug dali ra ning i-programa og usab o “i-retrofit” o dugangan og mga kahimanan nga mopasulbong sa kapasidad nga gamay ra kaayo og gasto aron mohaom sa mga frequency sa 1100 MHz nga gigahin sa PLDT/Smart ug sa nakuha gikan sa Digitel.

Aron paigo ang mga frequency band ug aron pantay-pantay ang dulaanan sa industriya sa telecom kontra sa duopolyo, ang ikatulo nga magdudula kinahanglan nga gahinan og igo-igo nga frequency sa 700 MHz o mas maayo sa 600 MHz band nga giabrihan sa gobyerno para sa mga telebesyon nga kinahanglan mobalhin na ngadto sa High Definition TV (HDTV). Kini nga mga kompanya sa telebesyon moakupar lamang og bahin sa 600 MHz band ug ang nahabilin sa band pwedeng igahin ngadto sa ikatulong magdudula nga seguradong molukso dayon ngadto sa 5G.

Dili ko mailad niining kalit nga pagkamaayo kuno sa PLDT/Smart sa iyang pag-uli sa CURE frequency. Kanang maong frequency dapat gisurender na kaniadto pa sa gobyerno nga walay kondisyones. Dili dapat nga ipailawom na sa spekulasyon sama sa balay ug lote nga pwedeng imanipular ang presyo. (Jun Ledesma)

 

Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read Our News on: http://www.mindanaoexaminer.com /http://mindanaoexaminernewspaper.blogspot.com/
Share Our News
Digital Archives: issuu.com/mindanaoexaminernewspaper

332 total views, 0 views today

Comments are closed.